李克勤今年為《聲夢傳奇》擔任「主理人」表現獲觀眾大讚，最近獲內地王牌音樂選秀節目《中國好聲音》重金禮聘擔任新一季導師，成功撼低台灣天王周杰倫。雖然酬金可觀，但而家去內地工作嘅藝人要經過一段時間嘅隔離，都咪話唔辛苦！不過克勤嘅前港姐冠軍太太盧淑儀亦有做「跟得夫人」陪伴老公，相信隔離期間都唔會覺得寂寞！
克勤「身價」好高！（IG圖片）
日前盧淑儀喺佢嘅社交平台上載由酒店內影出窗外嘅相，留言：「Lost（迷失）」，並貼上喊樣表情符號，相信隔離日子相當難捱。完成隔離出關後，盧淑儀即刻打卡，見佢於上海某商場內大曬長腿影相，星味依然；佢又多謝自己嘅「私人御用攝影師」，相信就係講緊老公李克勤。老夫老妻都仲咁恩愛，超閃！
其實二人嘅姻緣早喺29年前已定下。1992年盧淑儀參加港姐競選，而克勤係當屆嘅主持。於問答環節中，成頭濕晒嘅克勤拎住個「手榴彈」，好驚咁話拆彈專家要40分鐘後先到，問盧淑儀而家可以點做？盧淑儀就一邊伸手摸克勤，一邊講：「我會先幫你抹汗。」之後仲展露出甜美笑容！盧淑儀回答話會講嘢分散克勤嘅注意力，克勤就覺得講嘢講唔到40分鐘。對方就提議唱首歌畀克勤聽，克勤即刻話好想聽，仲問佢唱咩歌，佢就話不如唱克勤嘅《護花使者》，引到台下觀眾大笑。克勤聽完表示開心到「手榴彈」都掉咗啦！之後就同盧淑儀一齊返入後台。二人就係咁樣撻着，盧淑儀成為當屆港姐冠軍，冇耐就同克勤拍拖，佢哋咁多年愛火都冇熄過；後來女方退出娛樂圈，2006年結婚至今育有兩個仔，幸福滿瀉